កុំ ភ័យទោះជាសង្គ្រោះជាតិគំរាមធ្វើបាតុកម្ម រដ្ឋាភិបាលនឹងប្រកាន់ជំហរអនុវត្តច្បាប់ ដើម្បីរក្សាសន្ដិសុខជូនប្រជាពលរដ្ឋទូទៅ
27-May-2016 | ដោយ មែន កំសត់
ភ្នំពេញ ៖ បើទោះបីជាមានការចេញសេចក្ដីប្រកាសព័ត៌មានពីគណបក្សសង្គ្រោះជាតិ ដែលថាស្ថានភាពនយោបាយនៅកម្ពុជាកំពុងតែមានសភាពធ្ងន់ធ្ងរ ហើយគ្រោងនឹងដង្ហែញត្តិថ្វាយព្រះមហាក្សត្រ ឬធ្វើមហាបាតុកម្មអហិង្សាដើម្បីប្រឆាំងនឹងការឃាត់ខ្លួនលោកកឹម សុខា ក្ដីក៏រាជរដ្ឋាភិបាលហាក់ពុំបានបង្ហាញក្ដីបារម្ភអ្វីនៅឡើយ ដោយហេតុថាបញ្ហានេះពុំមានជាបញ្ហាធំរបស់ជាតិ តែជាបញ្ហារបស់បុគ្គលមួយចំនួន ដែលហាក់មិនចង់គោរពនីតិរដ្ឋ ហេតុនេះរដ្ឋាភិបាលក៏ពុំមានវិធានការអ្វីច្រើនដែរ ក្រៅតែពីរក្សាជំហរអនុវត្តផ្លូវច្បាប់តែប៉ុណ្ណោះ។
ឯកឧត្តម ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ដ្រី បានបញ្ជាក់ប្រាប់រស្មីកម្ពុជា នារសៀលថ្ងៃទី២៧ខែឧសភា នេះថា បើទោះបីជាខាងណាគេធ្វើព្យុះភ្លៀងអ្វី ក៏រដ្ឋាភិបាលពុំចាប់អារម្មណ៍ដែរ តែរដ្ឋាភិបាលនឹងរក្សាជំហរអនុវត្តច្បាប់ ដែលជាកតព្វកិច្ចក្នុងការរក្សាសន្ដិសុខ សណ្ដាប់ជូនដល់ប្រជាពលរដ្ឋទូទៅ។
ឯកឧត្តមបានមានប្រសាសន៍ថា “...យើងមានជំហរអនុវត្តផ្លូវច្បាប់ ដែលជាកតព្វកិច្ចរបស់រាជរដ្ឋាភិបាលក្នុងកិច្ចការពារសណ្ដាប់ធ្នាប់ សង្គម...ដូច្នេះយើងមិនអាចឲ្យអ្នកណាមួយធ្វើអ្វីផ្ដេសផ្ដាសបានេ ទេ..”។
ដោយឡែកឯកឧត្តមប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ ក៏បានបញ្ជាក់ឲ្យដឹងដែរថាបើទោះបីជាមានការផ្សព្វផ្សាយថា គណៈបក្សសង្គ្រោះជាតិនឹងធ្វើមហាបាតុកម្ម ឬការដង្ហែញត្តិនោះក្ដីតែលោកក៏នៅពុំទាន់បានទទួលការស្នើសុំនៅ ឡើយទេ។ ប៉ុន្តែលោកថា ទោះបីជាយ៉ាងណាក៏ដោយ គណៈអភិបាលរាជធានីនឹងអនុវត្តតាមច្បាប់ មិនមែនថាចង់ធ្វើក៏ធ្វើទៅបាននោះទេ គឺវាប៉ះពាល់ដល់សណ្ដាប់ធ្នាប់សាធារណៈ ដែលជាការរំលោភច្បាប់នោះ គឺមិនអាចអនុគ្រោះបានឡើយ។
ឯកឧត្តមប៉ា សុជាតិវង្សបានបញ្ជាក់ប្រាប់សារព័ត៌មានដូចនេះថា “ ...ជាការពិតទៅត្រូវតែអនុវត្តតាមច្បាប់ពីការធ្វើបាតុកម្មហើយ មិនអាចថា គាត់ចង់ធ្វើក៏ធ្វើ ដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈ អាហ្នឹងវាជាការរំលោភច្បាប់មួយទៀតដែលយើងមិនអាចនឹងអនុគ្រោះឲ្យបាន ទេ”។
ក្រៅពីនេះ លោកអភិបាលរាជធានីក៏បានបន្ថែមថា រឿងដីកាដែលតុលាការបានចេញនេះ គឺជារឿងបុគ្គលរបស់លោកកឹម សុខា តែម្នាក់នោះទេ គឺពុំមានទាក់ទងទៅនឹងគណបក្សទេ ប៉ុន្តែគាត់បែរជាបំផុស កៀងគរសមាជិកឬអ្នកគាំទ្រមកទទួលខុសត្រូវនោះក៏មិនអាចលើកលែងបាន ឡើយ។
ឯកឧត្តមថា “ការដែលដាក់នេះ មិនមែនដាក់ទោសគណបក្សទេ គឺដាក់ទោសបុគ្គល ព្រោះបុគ្គលហ្នឹងបានធ្វើឲ្យមានកំហុសដែលមុននេះគ្រាន់តែ ត្រូវបំពេញកតព្វកិច្ចជាសាក្សីសោះហ្នឹង តែគាត់មិនព្រម..ចឹងមានន័យថាគាត់មានចេតនាប្រឆាំងនឹងច្បាប់ ប្រឆាំងនឹងនីតិរដ្ឋហើយ ហើយអាហ្នឹងជាកំហុសរបស់គាត់”។
លោកអភិបាលរាជធានីរូបនេះ ក៏បានបញ្ជាក់ដែរថា “ក្រៅពីនេះ យើងក៏នឹងមើល ថាតើគោលបំណងនៃការធ្វើបាតុកម្មហ្នឹង គឺដើម្បីអី បើសិនជាការធ្វើទៅហ្នឹង គឺដើម្បីប្រឆាំងនឹងច្បាប់ ប្រឆាំងនឹងនីតិរដ្ឋ អាហ្នឹងជាកំហុសមួយទៀតដែលមេដឹកនាំគណបក្សរូបនេះ កាន់តែធ្វើឲ្យជាបញ្ហាធ្ងន់ធ្ងរ”។
ឯកឧត្តមប៉ា សុជាតិវង្ស ក៏បានបង្ហើបឲ្យដឹងដែរថា ដោយសារតែពុំមានការស្នើសុំ ឬតម្រុយពិតប្រាកដក្នុងការធ្វើបាតុកម្មឬដង្ហែញត្តិរបស់ក្រុម អ្នកគាំទ្រគណបក្សសង្គ្រោះជាតិនោះ កម្លាំងសមត្ថកិច្ចក៏ពុំទាន់មានការចាត់តាំងអ្វីដែរគឺគ្រាន់តែ រក្សាកម្លាំងរក្សាសន្ដិសុខដូចធម្មតាតែប៉ុណ្ណោះ។
គួរបញ្ជាក់ថា បន្ទាប់ពីមានដីការរបស់អយ្យការអមសាលាដំបូងរាជធានីភ្នំពេញ ដែលតម្រូវឲ្យមានការឃាត់ខ្លួនលោកកឹម សុខា អនុប្រធានគណបក្សសង្គ្រោះជាតិ បក្សនេះក៏បានបើកកិច្ចប្រជុំគណៈកម្មាធិការអចិន្ត្រៃយ៍ នៅព្រឹកថ្ងៃទី២៧ ឧសភា នេះដែរ ដោយបានចេញលទ្ធផលនៃកិច្ចប្រជុំចំនួន៤ចំណុច ពាក់ព័ន្ធស្ថានភាពនយោបាយនាពេលថ្មីៗនេះ នៅក្នុងក្នុងនោះគណបក្សសង្គ្រោះជាតិ ក៏បានប្រកាន់យកវប្បធម៌សន្ធនាជាមូលដ្ឋាន ក្នុងការស្តារស្ថានការណ៍នយោបាយ ឲ្យមានភាពប្រក្រតីឡើងវិញ។
យោងតាមសេចក្តីប្រកាសព័ត៌មានរបស់គណបក្សសង្គ្រោះជាតិ បានបញ្ជាក់ថា នៅចំពោះមុខស្ថានការណ៍បែបនេះគណៈកម្មាធិការអចិន្ត្រៃយ៍គណបក្ស បានសម្រេចដូចខាងក្រោម៖ ទី១-ឲ្យថ្នាក់ដឹកនាំគណបក្សមូលដ្ឋានគ្រប់រាជធានី-ខេត្តដង្ហែញត្តិ មករាជធានីភ្នំពេញ ដើម្បីថ្វាយព្រះមហាក្សត្រ, ទី២-គាំទ្រឲ្យអ្នកតំណាងរាស្ត្រគណបក្សសង្គ្រោះជាតិ តាមរយៈក្រុមសាមជិកសភា ធ្វើញត្តិផ្ញើជូនប្រធានរដ្ឋសភា ដើម្បីបញ្ជាក់ប្រាប់ថា តំណាងរាស្ត្រគណបក្សសង្គ្រោះជាតិទាំងអស់មិនអាចទៅបំពេញការងារនៅ មន្ទីររដ្ឋសភា បានក្នុងកាលៈទេសៈដែលមានការរំលោភបំពានអភ័យឯកសិទ្ធិសភារបស់ អ្នកតំណាងរាស្ត្រជាបន្តបន្ទាប់បែបនេះ, ទី៣-គណបក្សនឹងប្រើប្រាស់សិទ្ធិធ្វើមហាបាតុកម្មអហិង្សា ក្នុងករណីដែលមានការចាប់ខ្លួនលោក កឹម សុខាប្រធានស្តីទីគណបក្សសង្គ្រោះជាតិ និងទី៤-បន្តយកវប្បធម៌សន្ទនា ធ្វើជាមូលដ្ឋាន ក្នុងការស្តារស្ថានការណ៍នយោបាយឲ្យវិលមករកភាពប្រក្រតីឡើងវិញ ដើម្បីធានាឲ្យការបោះឆ្នោតនាឆ្នាំ២០១៧-២០១៨ ខាងមុខប្រព្រឹត្តទៅដោយ សេរី ត្រឹមត្រូវ និងយុត្តិធម៌៕
ចំនួនអ្នកទស្សនា
- ថ្ងៃនេះ1651
- ម្សិលមិញ2851
- សប្តាហ៍នេះ7761
- ខែនេះ233431
- ឆ្នាំនេះ233431
- សរុប20675887